Астанада таңғы уақытта көшелердегі көлік кептелісін азайту мақсатында мемлекеттік мекемелер мен кейбір ұйымдардың жұмыс уақытына өзгеріс енгізу мәселесі қарастырылып жатыр. Бұл туралы елорда әкімі Жеңіс Қасымбек мәлімдеді.
Көлік жүктемесін азайту – басты мақсат
Ақордада өткен шара барысында тілші әкімнен елордалық ұйымдарды жаңа жұмыс тәртібіне көшіру туралы шешім жайлы сұрады. Жеңіс Қасымбектің айтуынша, қазіргі таңда қаланың түрлі аудандарындағы көлік ағынына талдау жүргізілуде.
«Біз бүгінгі күні көлік ағынын әртүрлі аудандарда зерттеп жатырмыз. Сол себепті, кептелістерге қатысты мәселелерді шешудің бірнеше жолдарын қарастырудамыз. Соның бірі – жұмыс күнінің басталу, түскі үзіліс не жұмыс күнінің аяқталу уақытын өзгерту. Бұл нақты аудандарға немесе белгілі бір қызмет салаларына қатысты болуы мүмкін», – деді қала басшысы.
Әкімнің айтуынша, бұл өзгеріс ең алдымен мемлекеттік органдар, бюджеттік мекемелер және коммуналдық қызметтерге қатысты болуы ықтимал. Жаңа тәртіпке сай, аталған мекемелер жұмысын таңғы 08:30-да бастайтын болады.
«Бұл таңғы сағат 9-ға қарай көлікпен қалаға ағылатын ағынды азайтуға сеп болады. Мұндай тәжірибе әлемнің көптеген елінде бар. Шын мәнінде, өзіміздің қалада да қазір таңғы 8:00-де жұмысын бастайтын мекемелер бар – бұл қалыпты жағдай», – деп атап өтті Қасымбек.
Шешім қашан қабылданады?
Қазіргі уақытта бұл мәселе әлі зерттелу үстінде. Тиісті талдау жұмыстары маусым айының соңына дейін аяқталады деп күтілуде. Ал нақты шешім қабылданған жағдайда, ол туралы ресми түрде тамыз айында хабарланатын болады.
«Анализ осы айдың ішінде аяқталуы тиіс. Егер шешім қабылданатын болса, біз бұл туралы тамыз айында жариялаймыз», – деді әкім.
Қоғамдық пікір мен тәжірибе
Жұмыс уақытын өзгерту қала тұрғындары үшін қаншалықты тиімді болары әзірге белгісіз. Бір жағынан, таңғы көлік тығынын азайту арқылы қоғамдық көлікпен жүру мен жеке көлік қозғалысы жеңілдейтін еді. Екінші жағынан, ата-аналар мен мектепке дейінгі білім беру ұйымдарының тәртібіне әсер етуі мүмкін.
Дегенмен, әлемнің ірі мегаполистерінде мұндай тәжірибенің оң нәтиже бергені белгілі. Мысалы, Сингапур, Лондон мен Токио қалаларында кейбір мекемелер түрлі уақыт кестесімен жұмыс істейді – бұл қала инфрақұрылымына түсетін жүктемені теңестіруге мүмкіндік береді.
Елорда әкімдігінің бұл бастамасы – Астанадағы көлік мәселесін жүйелі түрде шешуге бағытталған қадамдардың бірі. Егер бұл жоба сәтті іске асса, болашақта басқа да сала мекемелерінің жұмыс уақыты өзгеруі мүмкін. Қала тұрғындары үшін бастысы – шешімнің қоғамдық және әлеуметтік салдары мұқият ескеріліп, тиімді ұйымдастырылуы.
Самал Асқар
