Құрбан айт қарсаңында Қазақстанда ет бағасы өсіп жатыр. Бір айда ең көп қымбаттаған — қой еті (3,3 %), одан кейін сиыр еті (2,2 %) мен жылқы еті (1,5 %). Ал құс еті керісінше арзандаған. Бұл туралы EnergyProm сараптамалық орталығы мәлімдеді.

Мұсылмандар Құрбан айт кезінде құрбандық шалып, етті мұқтаж жандармен бөлісетіндіктен, бағаның мұндай құбылуы отбасылық бюджетке айтарлықтай әсер етеді.

Еттің ең көп қымбаттауы байқалған өңірлер:

▪️Батыс Қазақстан облысы – 2,9 %;

▪️Жамбыл облысы – 2,6 %;

▪️Шымкент қаласы – 2,1 %.

Соңғы деректер бойынша, еттің орташа бөлшек бағасы:

— сүйекті сиыр еті – 3000 теңге/кг (бір жыл бұрын – 2700 тг);

— қой еті – 3100 теңге/кг;

— жылқы еті – 3200 теңге/кг;

— шошқа еті – 2300 теңге/кг;

— тауық еті – 1500 теңге/кг.

Құрбандыққа шалынатын малдың 2024 жылғы орташа бағасы:

— бұқа – 428,6 мың теңге;

— сиыр – 376 мың теңге;

— қой – 41,2 мың теңге;

— лақ – 21,9 мың теңге;

— жас түйе – 422,7 мың теңге.

Статистика бойынша, 1 мамырдағы жағдай бойынша Қазақстанда:

— 9,4 млн ірі қара,

— 23,1 млн қой,

— 4,8 млн жылқы,

— 314,7 мың түйе тіркелген.

Бір жыл ішінде 317,1 мың тонна мал мен құс еті сойылып, бұл өткен жылмен салыстырғанда 3,2 % көп. Ет өндіру бойынша Алматы облысы көш бастап тұр, одан кейін Ақмола және Түркістан облыстары келеді.