Қазақстанда 20 қазаннан бастап карантиндік шектеулер жеңілдейді. Бұл туралы денсаулық сақтау министрі Алексей Цой жеткізді.
Цой эпидемиологиялық ахуалдың тұрақтанғанын және вакциналауға жататын халықтың 70%-тен астамының екпе алғанын хабарлады. Бұл 2021 жылдың 20 қазанынан бастап карантинді жеңілдету туралы шешім қабылдауға негіз болған.
Атап айтқанда, медициналық-әлеуметтік нысандардың (қарттар мен мүгедектер үйі, балалар үйі және тағы басқа) пациенттеріне баруға рұқсат етіледі. Ол үшін вакцинаның екі дозасын алғаны туралы құжат немесе мерзімі 3 тәуліктен аспаған теріс нәтижелі ПТР-анықтама көрсету керек.
Сондай-ақ тек «жасыл» статусы бар адамдар үшін түнгі клубтардың жұмысы жанданады. Бірақ адам саны 50 пайыздан аспауға тиіс:
«жасыл» аймақта 100 адамнан;
«сары» аймақта – 70 адамнан;
«қызыл» аймақта 50 адамнан көп емес.
Бұдан бөлек, ASHYQ жобасына қатысатын бизнес нысандарының жұмыс уақыты ұзартылады:
«жасыл» аймақта сағат 03.00-ге дейін, жоба лидерлері үшін – 05.00-ге дейін;
«сары» аймақта 01.00-ге дейін, жоба лидерлері үшін – 03.00-ге дейін.
