АҚШ-та 5 желтоқсан күні 41-президент үлкен Джордж Бушпен ресми түрде қоштасты. Үлкен Буш қарашаның 30-ы күні 94 жасында Хьюстонда қайтыс болған. Ресми қоштасу рәсімі Вашингтондағы Ұлттық соборда өтті. Бұл жерге бұрынғы президенттің мүрдесі салынған табытты Капитолийдің АҚШ парламентінің «жүрегі» саналатын Ротонда күмбезінен үстіне мемлекеттік ту жауып алып келді. Күмбезде екі күн тұрған табытқа мыңдаған америкалық құрмет көрсетіп, гүл шоқтарын қойды.

Қоштасу рәсіміне АҚШ президенті Дональды Трамп, бұрынғы төрт президент, Джордж Буштың отбасы, көрнекті саясаткерлер, үлкен Буш кезінде өзі әріптес болған бірнеше мемлекеттің бұрынғы басшылары  қатысты.

Қоштасуда бірінші болып сөйлеген тарихшы Джон Мичем үлкен Джордж Бушты «соңғы көрнекті сарбаз-президент», қиын кезеңдердегі «қорғанымыз» деп атады. Сөз сөйлегендердің кейбірі естелігінде бұрынғы президенттің әзіл мен өзін-өзі мысқылдауды ұнатқанын айтты.

Рәсімде үлкен Буштың ұлы, АҚШ-тың 43-президенті кіші Джордж Буш та сөйледі.

БАҚ-тың хабарлауынша, Буштың жанұясы сөз сөйлегендерден ешқандай саяси мәлімдеме жасамауды сұраған. Дегенмен, кейбір бақылаушылар алғашқы қатарда бұрынғы үш президентпен және олардың әйелдерімен бірге отырған президент Дональд Трамп өзіне дейін президент болған Барак Обамаммен және оның әйелімен ғана қол алысқанына назар аударады.

Қоштасу рәсімінен соң үлкен Джордж Буштың мүрдесі салынған табытты ұшақпен Хьюстонға алып кетті. Бұл жерде бұрынғы президентпен оның отбасы қоштасады. Үлкен Джордж Буш 6 желтоқсан күні Техастағы өзінің атындағы президенттік кітапхананың аумағына, жеті ай бұрын қайтыс болған зайыбы Барбара мен 1953 жылы үш жасында шетінеген қызы Робиннің қасына жерленеді.