Алматы облысының прокуратурасы ірі көлемдегі валюталық заңбұзушылықты анықтады. «Т» ЖШС шетелдік компаниямен жалпы сомасы 6 миллион АҚШ долларын құрайтын сыртқы экономикалық келісімшарт жасасқанымен, Қазақстанға нақты келген тауар құны небәрі 3,7 миллион долларды құрады.
Қалған 2,3 миллион доллар шетелге шарттық міндеттемелерді бүркемелеу арқылы заңсыз шығарылған. Компания шетелге аударылған қаражатты қайтару үшін ешқандай шара қолданбаған, ал салық органдары репатриация талабын орындауға бақылау жасамаған.
Осыған байланысты облыстық прокуратура Қазақстан Республикасының Әкімшілік құқықбұзушылық туралы кодексінің 251-бабы 2-бөлігі бойынша («Ұлттық және (немесе) шетел валютасын репатриациялау талабын орындамау») әкімшілік іс қозғады.
Қонаев қаласының соты «Т» ЖШС-ны кінәлі деп танып, 239 миллион теңге көлемінде айыппұл салды. Сот қаулысы заңды күшіне енді.
Алматы облысының прокуратурасы валюталық заңнама талаптарының сақталуын қамтамасыз ету бойынша жұмысын жалғастыруда.
