Бүгін Бас прокуратурада кибералаяқтыққа қарсы іс-қимыл мәселелері жөніндегі ведомствоаралық кеңес өтті. Жиынға Ұлттық банк, Қаржы нарығын реттеу және дамыту агенттігі, Ішкі істер, Цифрлық даму, Сауда және интеграция, Мәдениет және ақпарат министрліктері, сондай-ақ «Астана» халықаралық қаржы орталығының өкілдері қатысты, деп хабарлайды Arasha.kz.
Соңғы жылдары интернет-алаяқтық тек жаһандық проблема ғана емес, сонымен қатар елдің ұлттық қауіпсіздігіне төнген қатерге айналды. Технологиялардың дамуы мен цифрлық байланыс құралдарының кеңеюі алаяқтық әдістерінің күрделене түсуіне алып келді.
2024 жылдың өзінде елімізде 14 мыңнан астам интернет-алаяқтық дерегі тіркелді. Бұл өткен жылдың сәйкес кезеңімен салыстырғанда 22%-ға көп. Келтірілген қаржылық залал 6 миллиард теңгеден асты. Оның тек 26%-ы ғана жәбірленушілерге өтелген.
Дропперлер мен киберқылмыстық топтар әшкереленді
Алаяқтарға өздерінің төлем құралдарын берген 217 азамат (дроппер) қылмыстық жауапкершілікке тартылды. Сонымен қатар, 61 киберқылмыстық топтың жолы кесіліп, жалпы сомасы 2,9 миллиард теңгеден асатын күмәнді транзакциялар бұғатталды.
Кеңес барысында алаяқтықтың себептері мен оның салдары егжей-тегжейлі талданды. Жеке деректердің заңсыз таралуы, SIM-карталардың көлеңкелі айналымы және SIP-телефонияның алаяқтық мақсатта қолданылуы мәселелері көтерілді. Осыған байланысты нақты іс-шаралар жоспары бекітіліп, оларды іске асыру жауапты органдарға тапсырылды.
232-1-бап: жаңа жаза күшіне енеді
Қыркүйек айынан бастап Қылмыстық кодекске енгізілген жаңа 232-1-бап күшіне енеді. Ол бойынша материалдық сыйақы үшін өз төлем құралдарын үшінші тұлғаларға берген азаматтар (дропперлер) 7 жылға дейін бас бостандығынан айырылуы мүмкін.
Прокуратура ескерту жасайды
Бас прокуратура азаматтарға сақ болуға кеңес береді:
Егер сіздің банк шотыңызды бөгде біреулер пайдаланса, дереу банкке хабарласыңыз.
Онлайн-банкинг арқылы картаңызды бұғаттап, құқық қорғау органдарына жүгініңіз.
Жалпы, жәбірленушілердің құқықтарын қорғау және интернет-алаяқтықпен күресу прокуратура қызметінің басым бағыттарының бірі болып қала береді.
