Бір кездері елді дүр сілкіндіріп, "адамжегіш" деген атаумен танылған Николай Жұмағалиев бүгінде түрмеде емес. Ол Алматы облысындағы Ақтас ауылында орналасқан республикалық психиатриялық ауруханада ем қабылдап жатыр. Бұл туралы Instagram желісінде журналист Асмира Ермекқызы жазды. Оның айтуынша, ол кезінде аталған мекемеде 14 жыл бойы маньяктармен жұмыс істеген психолог Ақмарал Шегентайқызымен сұхбаттасқан, деп хабарлайды Arasha.kz.
Николай Жұмағалиев алғашқы қылмысын 1978 жылы жасаған. Ол жұмыстан қайтып келе жатқан жас әйелге шабуыл жасап, оны өлтірген. Кей деректерде қылмыстан кейін марқұмның қанын ішіп, мәйітпен жыныстық қатынасқа түскені, тіпті денесінің бір бөлігін үйіне алып кетіп, тамақ әзірлегені айтылады. Ресми мәліметтерде оның құрбандарының саны 57 деп көрсетілгенімен, мамандар шын мәнінде бұл сан бұдан да көп болуы мүмкін екенін жоққа шығармайды.
Психологтардың түсіндіруінше, Қазақстан заңнамасына сәйкес мұндай тұлғалар қылмыстық жауапкершілікке тартылмайды. Олар психикалық ауытқуы бар деп танылып, республикалық деңгейдегі психиатриялық мекемелерге мәжбүрлі түрде жатқызылады. Мамандардың айтуынша, Жұмағалиев ауруханадағы ең тәртіпті емделушілердің бірі саналады: сабырлы, көп сөйлемейді, психоэмоционалдық күйі салыстырмалы түрде тұрақты.
Психиатрлар шизофрениямен ауыратын адамдарды сырт көзге ажырату қиын екенін айтады. Бұл дертке шалдыққан жан өзін толықтай қалыпты ұстай алады. Жұмағалиев те алғашында психикалық ауытқуы бар адам ретінде танылмаған – тергеу барысында сұрақтарға нақты әрі логикалық жауап берген. Алайда кейін жүргізілген сараптамалар, соның ішінде ресейлік мамандардың қорытындысы, оның шизофрениямен ауыратынын дәлелдеген. Ол өз әрекеттерін "қоғамды жезөкшелерден тазарту" деген фиксациялық идеямен ақтаған.
Қазір 73 жастағы Жұмағалиев Ақтастағы ауруханада күнделік жазумен айналысады. Алайда оның мазмұны беймәлім – жазбаларды ешкім оқымаған. Бейресми әңгімелерде ол болашақта бостандыққа шықса, сол жазбаларын кітап етіп шығарғысы келеді деген қауесет те бар.
