Атырау облысының Қызылқоға ауданындағы Жангелдин ауылында орын алған ауыр қылмысқа байланысты қозғалған іс бойынша тергеу амалдары әлі де жалғасуда. Ерлі-зайыптының қаза табуы және отбасының тағы екі мүшесінің хабар-ошарсыз кетуі қоғамда үлкен резонанс тудырды. Мәйіттер табылған соң, тергеу органдары марқұмдардың күйеу баласының бұл іске қатысы болуы мүмкін деген нұсқаны тексеріп жатыр, деп хабарлайды Arasha.kz.
Алдын ала мәлімет бойынша, ерлі-зайыптылардың денелері ауладағы шаруашылық құрылыстан табылған. Тергеу қасақана адам өлтіру дерегін негізгі нұсқа ретінде қарап отыр. Қылмысты бір адамның немесе бірнеше адамның жасағаны әзірге нақтыланбаған. Сот-медициналық сараптама өлімнің себебін, уақыты мен қолданылған құралды анықтауы тиіс.
Іс материалдарында басты күдікті ретінде 29 жастағы күйеу бала Сұлтан Сәрсемалиевтің есімі аталады. Тергеу барысында оның жақын туыстары жауап бергенімен, күдіктінің өзі мен жұбайының нақты қайда екені белгісіз күйінде қалып отыр. Сонымен қатар марқұмдардың үлкен қызы да із-түзсіз жоғалғандар қатарында.
Құқық қорғау саласында жұмыс істейтін, отбасыға жақын таныс адамның айтуынша, бұл әулет өте тұйық әрі діндар өмір салтын ұстанған. Олар ауыл ішінде көпшілікпен араласпаған, үйден сирек шыққан. Бес баланың анасы болған келіншекті тіпті туыстары да көрмеген. Ерлі-зайыптылардың ресми жұмыс істемеуі де күмән туғызғанымен, тиісті алдын алу шаралары қолданылмаған.
Күдіктінің анасы ұлының кейде байланысқа шығатынын, алайда қоңырауларға жауап бермейтінін айтқан. Ал бейресми дереккөздер мен әлеуметтік желілерде тараған мәліметтерге сүйенсек, Сұлтан шетелде, нақтырақ айтқанда Бали аралында болуы мүмкін. Сондай-ақ оның жоғалған әйелдердің бірінің банк картасын пайдалануы ықтимал деген ақпарат бар.
Марқұм Максот Қарабалиннің әпкесі күйеу баланың ұзақ уақыт бойы жұбайының жағдайы мен жүрген жерін жасырып келгенін алға тартады. Оның айтуынша, қараша айынан бері жоғалғанына қарамастан, күдіктінің анасы полицияға хабар бермей, бес баланы өз үйінде қалдырған.
Құқық қорғау органдарындағы дереккөздер күдіктінің Индонезия аумағында болуы мүмкін екенін жоққа шығармайды. Тергеу барысына сәйкес, ол елден біржола кетуге әрекет жасауы ықтимал.
Қазіргі таңда Атырау облыстық полиция департаменті жедел-іздестіру және тергеу шараларын жалғастырып жатыр. Алайда іс бойынша ресми мәліметтер әзірге шектеулі.
Айта кетейік, бұған дейін 1959 жылы туған Максот Қарабалин мен Нәсіп Өтешқалиеваның мәйіттері табылып, қылмыстық іс адам өлтіру бабы бойынша тіркелген. Ал отбасының тағы екі мүшесінің тағдыры әлі күнге дейін белгісіз.
