АҚШ президенті Дональд Трамп ықтимал бейбіт келісімнің жасалуына Ресей емес, Украина кедергі келтіріп отыр деп мәлімдеді, деп хабарлайды Arasha.kz.
Овал кабинетінде Reuters агенттігіне берген эксклюзивті сұхбатында Трамп Ресей президенті Владимир Путин өзі бастаған және төрт жылға жуық уақытқа созылған Украинадағы соғысты аяқтауға дайын екенін айтты.
«Меніңше, ол келісім жасасуға дайын, — деді Трамп Ресей президенті туралы. — Менің ойымша, Украина келісімге онша дайын емес».
АҚШ-тың патронажымен жүріп жатқан келіссөздер неліктен Екінші дүниежүзілік соғыстан бергі Еуропадағы ең ірі әскери қақтығысты әлі күнге дейін шеше алмады деген сұраққа Трамп бір-ақ сөзбен жауап берді: «Зеленский». Нақтылаушы сұрақтан кейін ол: «Оған бұған бару қиын деп ойлаймын», — деп толықтырды.
Трамптың бұл сөздері Мәскеу Украинадағы соғысты тоқтатуға мүдделі емес деп есептейтін еуропалық одақтастардың ұстанымына мүлдем қайшы келеді.
