17 жыл бойы құлдықта өмір сүрген Құндыздың журналист Руслан Өтепбай туралы айтқан мәлімдемесі қоғамда үлкен резонанс тудырды, деп хабарлайды Arasha.kz.
Жарияланған видеода Құндыз журналистің атына ауыр сөздер айтып, қоқан-лоқыға ұқсас мәлімдеме жасағаны естіледі.
Атап айтқанда, ол: "Маған жақсылық жасамай-ақ қойсын" деген мазмұндағы сөздер айтқан.
Сонымен қатар видеода боғауыз сөздер де кездеседі. Әлеуметтік желі қолданушылары бұл жағдайға қатысты түрлі пікір білдіріп, Құндыздың әрекетін түсіне алмай отырғандарын жазуда. Кейбірі журналистің осы іске белсене араласқанын еске салса, енді біреулері бұл сөздерге біреудің ықпалы болуы мүмкін екенін немесе эмоциялық күйдің әсері барын болжауда.
Желіде пікір білдірушілер арасында "Руслан бұл адамдар үшін көп еңбек етті", "Біреулер әдейі қарсы қойып отырғандай", "Эмоциямен айтылған сөздер болуы мүмкін" деген сарындағы ойлар жиі кездеседі.
Қазіргі таңда аталған видеоға қатысты ресми органдар тарапынан түсініктеме берілген жоқ.
