Ұлытау облысының Жәйрем кентінде жан түршігерлік қылмыс орын алды – төрт баланың анасы қаза тапты. Бұл іске оның 33 жастағы бірге тұратын ер адамы күдікті ретінде қарастырылып отыр, деп хабарлайды Arasha.kz.
Қайғылы оқиға Жәйрем кентінде болған. 42 жастағы Әйгерімге 20 пышақ жарақаты салынған. Tengrinews.kz сайтының тілшілері марқұмның әпкесі Данамен сөйлесіп, мәселенің мән-жайымен танысты.
Әйгерім төрт баланы жалғыз өзі асыраған. Ол дүкен сатып алып, жұмыс істеп, бірнеше пәтер алып, оларды жалға берген. Туыстарының айтуынша, ол өте еңбекқор болған.
"Ол тынымсыз еңбек ететін. Барлығы өз мойнында болды. Төрт баласын өзі асырап, үнемі табыс табудың жолын іздейтін", – дейді әпкесі .
Марқұмның артында төрт баласы қалды: үлкені студент, екіншісі мектепте оқиды, шахматпен айналысады. Кіші екі бала – ұл мен қыз. Қызы 5 жаста, мүгедектігі бар, бала кезінде инсульт алған.
"Ол қызын аяғынан тұрғызды. Дәрігерлер оны басқа аналарға үлгі ететін", – дейді туысы .
Жақындарының айтуынша, Әйгерім өте мейірімді жан болған.
"Ол бәріне көмектесетін. Адамдарға жаны ашитын, жануарларды да қорғаштайтын. Мен оған "сен тым мейірімдісің" дейтінмін", – деп еске алады әпкесі .
Әйгерім бірге тұрған ер адамымен ресми некеде болмаған. Алғашында ол қамқор болғанымен, уақыт өте келе агрессивті мінез көрсете бастаған.
"Басында жақсы қарады. Кейін қызғаныш, агрессия, ұрып-соғу басталды. Оған әдемі киінуге де тыйым салатын", – дейді әпкесі .
Ер адам жұмыс істемеген, ішімдікке әуес болған. Барлық шығынды Әйгерім өзі көтерген.
"Ол ауыр жүрек ауруымен ауырды, жұмыс істемеді. Әйгерім оны асырап, емдетті, Астанаға дәрігерлерге апарды", – дейді туысы .
Отбасында зорлық-зомбылық жиі болғаны айтылады.
"Ол оған да, анасына да, үлкен ұлына да қол көтерген", – дейді әпкесі .
Соған қарамастан, Әйгерім қарым-қатынасты сақтауға тырысқан.
Марқұм мен оның туыстары бірнеше рет полицияға жүгінген.
"Ол одан қорқатын. Полиция алып кетсе де, 15 минуттан кейін қайта келетін", – дейді әпкесі .
Қайғылы күнге дейін Әйгерім ер адамнан кетіп, оны жалға беретін пәтерлерінің біріне жіберген.
Қылмыс күндіз болған. Соңғы рет Айгерім сағат 13:55 шамасында байланысқа шыққан. Ол сол кезде өз дүкенінде болған.
"Ол келіп, пышақпен шабуыл жасаған. 20 рет пышақ сұққан. Үшеуі маңызды мүшелерге тиген", – дейді әпкесі .
Осыдан кейін ер адам өзіне де қол жұмсамақ болған, бірақ тірі қалған.
Қылмыстық іс "аса қатыгездікпен жасалған кісі өлтіру" бабы бойынша қозғалған. Полицияның мәліметінше, күдікті ауруханада жатыр және қатаң күзетте. Кейін тергеу изоляторына ауыстырылады. Тергеу ісі ерекше бақылауға алынған.
Балалар бұл жағдайды ауыр қабылдаған. Үлкен ұлы эмоциясын ұстай алмаған, ал кішілері толық түсінбейді.
"Қызы "мама неге келмейді?" деп жылады", – дейді әпкесі .
Туыстары бұл қайғылы жағдайдың алдын алуға болар еді деп есептейді.
"Ол бәрін аяйтын. Тіпті оны да. Отбасын сақтағысы келді", – дейді әпкесі .
