Маңғыстау облысының фермерлері малдың жаппай қырылуынан кейін билікке көмек сұрап жүгінді, олар табиғи апаттан келген шығынды өтеуді сұрап отыр, деп хабарлайды Arasha.kz.
Lada.kz сайтының жазуынша, ең көп мал шығыны Қарақия ауданында тіркелді. Аудандық әкімдік ұсынған ресми мәліметтерге сүйенсек, 20 сәуірде 237 бас мал қырылған: жылқы – 108, тай – 5, құлын – 10, түйе – 2, бота – 5, қой мен ешкі – 107. 21 сәуірде тағы 316 жануар шығын болды.
Осылайша, екі күннің ішінде фермерлер 550-ден астам мал басынан айырылды.
Бұған дейін малдың қырылуына төтенше ауа райы жағдайлары – қатты жел мен нөсер жаңбыр себеп болғаны хабарланған еді. Жануарлар бағытынан жаңылысып, баруы қиын жерлерге тап болған және батпақты жерде қырылған. Үйірлердің бір бөлігі елді мекендерден 60-80 шақырым қашықтықта қырылуы мүмкін.
Енді фермерлер биліктен қырылған мал үшін өтемақы талап етіп, сондай-ақ мал өлекселерін жоюға көмектесуді сұрап отыр.
Маңғыстау облысының әкімдігі жағдайға байланысты жауап берді.
Ведомствоның мәлімдеуінше, қазіргі уақытта ауданда жердің шайылуы мен батпақтануына байланысты арнайы техника тарту жұмыстары жүргізілуде. Сондай-ақ мал басын түгендеу және тиісті актілерді рәсімдеу жұмыстары қолға алынды.
«Актілер жасалып, ветеринариялық қызметпен бірлесіп жануарлар идентификацияланғаннан (чиптері арқылы) кейін, арнайы техниканың көмегімен қырылған малды жою жұмыстары басталады. Мал шығыны үшін өтемақы төлеу мәселесі қолданыстағы заңнама аясында қаралатын болады», - деп хабарлады аймақ әкімдігінен.
