Венгрия президенті Тамаш Шуйоктың өкілеттігі ел Конституциясына енгізілген өзгерістерден кейін мерзімінен бұрын тоқтатылды. Мемлекет басшысы өзінің қызметтен кетуін көздейтін түзетуге қол қойғанымен, қабылданған шешімді демократия мен құқық үстемдігіне жасалған соққы деп бағалады, деп хабарлайды Arasha.kz.
Конституциялық өзгерісті сәуірдегі парламент сайлауында жеңіске жеткен премьер-министр Петер Мадьярдың «Тиса» партиясы ұсынған. Жаңа билік Шуйокты бұрынғы премьер-министр Виктор Орбанның саяси жүйесімен тығыз байланысты тұлғалардың бірі деп санаған.
Шуйок 2024 жылы сол кезде парламентте басымдыққа ие болған «Фидес» партиясының қолдауымен президент болып сайланған еді.
Президент міндетін парламент спикері атқарады
Жаңа мемлекет басшысы сайланғанға дейін Венгрия президентінің міндетін парламент спикері Агнеш Форстхоффер уақытша атқарады. Парламент жаңа президентті 30 күн ішінде таңдауға тиіс.
Қабылданған түзетулер президенттің өкілеттігін тоқтатумен ғана шектелмейді. Құжатта депутаттардың парламентте жұмыс істеу мерзімін 12 жылмен шектеу және Конституциялық сот судьяларына 70 жастан асқаннан кейін қызмет атқаруға тыйым салу қарастырылған.
Бұл өзгерістер бұрынғы премьер-министр Виктор Орбанның «Фидес» партиясындағы бірқатар саясаткер мен жоғары лауазымды тұлғаға әсер етуі мүмкін. Петер Мадьяр билігі реформаларды бұрынғы саяси жүйенің ықпалын азайту және мемлекеттік институттарға деген сенімді қалпына келтіру үшін қажет деп түсіндіреді. Ал Орбан мен оның жақтастары жаңа үкіметті билікті асыра пайдаланды деп айыптап отыр.
