Астанада көшелерді тазалау тәртібін өзгерту ұсынылды. Жаңа ережеге сәйкес, жолдарды арнайы техникамен тазалау жұмыстары көлік қозғалысы қарқынды болатын уақытта жүргізілмеуі мүмкін. Бұл мәселе елорда Қоғамдық кеңесінің отырысында қаралды, деп Arasha.kz тілшісі Tengrinews.kz-ке сілтеме жасап хабарлайды.
Қандай өзгерістер ұсынылды?
Жаңа талаптар бойынша күндізгі уақытта жолдарды механикалық тәсілмен тазалауға шектеу қойылады. Сондай-ақ жол бойындағы жасыл желектерді арнайы техникамен суару жұмыстары да күндіз жүргізілмейді. Өсімдіктерді суару алдын ала бекітілген кесте бойынша ұйымдастырылады.
Бұдан бөлек, мердігер ұйымдарға абаттандыру нысандарының сақталуына жауапкершілік жүктеу ұсынылды. Атап айтқанда, олар брусчатканың, жасыл желектердің, көше жиһазы мен жарықтандыру нысандарының бүлінбеуін қамтамасыз етуі тиіс.
Ұсынылып отырған талаптардың қатарында:
- салмағы 3,5 тоннадан асатын ауыр арнайы техниканың тротуарларға, жаяу жүргіншілер аймақтарына және брусчатка төселген аялдамаларға кіруіне тыйым салу;
- қыс мезгілінде балалар және спорт алаңдарын қардан тек қолмен тазалау;
- брусчаткадағы мұзды арнайы құралдармен қопарып тазаламау;
- газондардағы қарды жинамау және сыртқа шығармау.
Қазір бұл ережелер талқылану кезеңінде. Құжаттың күшіне енуі үшін оны Астана қаласының мәслихаты мақұлдап, кейін тиісті рәсімдерден өткізу қажет.
Неліктен жаңа тәртіп қажет?
Жол тазалайтын арнайы техниканың қарбалас уақытта жұмыс істеуі елордадағы көлік қозғалысына қосымша қиындық туғызуы мүмкін. Техника жолдың бір бөлігін алып, көлік жылдамдығын төмендетеді. Бұл әсіресе қозғалысы тығыз көшелерде кептелістің артуына әсер етуі ықтимал.
Бұған дейін Астана мәслихатының отырысында депутат Талғат Дюсеков қыс мезгілінде тротуарларды қар мен мұздан тазалау тәсілін өзгерту туралы ұсыныс айтқан. Оның пікірінше, жаяу жүргіншілер жүретін жолдарды асфальтқа немесе брусчаткаға дейін толық тазалаудың қажеті жоқ. Оның басты мақсаты: адамдардың қауіпсіз жүріп өтуіне жеткілікті жол ашу. Депутат мұндай тәсіл бюджет қаражатын үнемдеп, жол жабындарының сақталуына мүмкіндік береді деп есептейді.
