17 қазанда Қазақстанның бірқатар өңірінде күн суытып, жаңбыр мен қар жауады. Кей аймақтарда көктайғақ, тұман және шаңды дауыл күтіледі. Ал желдің екпіні секундына 28 метрге дейін жетуі мүмкін, деп хабарлайды Arasha.kz.
Синоптиктердің болжамынша, сенбі күні еліміздің солтүстік және шығыс өңірлерінде ауа райы құбылмалы болады. Батыста жаңбыр жауып, найзағай ойнауы ықтимал. Ал оңтүстік аймақтарда жауын-шашынсыз, салыстырмалы түрде жылы ауа райы сақталады.
Астана, Алматы және Шымкентте ауа райы қандай болады?
Астанада таңертең және күндіз жаңбыр жауады. Түнде ауа температурасы −3…−1 градусқа дейін төмендеп, күндіз +10…+12 градусқа көтеріледі. Желдің жылдамдығы секундына 9–14 метр болады.
Алматыда жауын-шашын күтілмейді. Түнде +1…+3, күндіз +13…+15 градус жылы болады. Алайда топырақ бетінде үсік жүруі мүмкін.
Шымкентте күндіз +22…+24 градусқа дейін жылынады. Түнде +8…+10 градус болады. Жауын-шашын болжанбайды, бірақ түнде желдің екпіні секундына 15–20 метрге дейін күшейеді.
Қай өңірлерде қар жауып, көктайғақ болады?
Ақмола, Қостанай, Солтүстік Қазақстан, Павлодар, Абай және Шығыс Қазақстан облыстарында жаңбыр мен қар аралас жауын-шашын күтіледі. Кей жерлерде тұман түседі.
Солтүстік Қазақстан облысының оңтүстігінде, сондай-ақ Абай және Шығыс Қазақстан облыстарының жекелеген аудандарында көктайғақ болуы мүмкін.
Қарағанды облысында кешке қарай аздаған жаңбыр жауады. Ал Ұлытау облысында жауын-шашын болжанбайды.
Солтүстік және шығыс өңірлерде күндіз ауа температурасы негізінен +3…+12 градус аралығында болады. Қостанай, Қарағанды және Ұлытау облыстарында +10…+18 градусқа дейін жылынады.
Ең төменгі температура Қарағанды және Шығыс Қазақстан облыстарының кей аудандарында тіркелуі мүмкін. Бұл өңірлерде түнде 9 градусқа дейін аяз болады.
Батыста жаңбыр, оңтүстікте қатты жел күтіледі
Батыс Қазақстан мен Атырау облыстарында жаңбыр жауып, найзағай ойнауы мүмкін. Маңғыстау облысында шаңды дауыл болжанып отыр. Ақтөбе облысында жауын-шашын күтілмейді.
Батыс өңірлерде күндіз ауа температурасы +17…+28 градус аралығында болады.
Алматы, Жетісу, Жамбыл, Түркістан және Қызылорда облыстарында негізінен жауын-шашынсыз ауа райы сақталады. Дегенмен кей аудандарда үсік жүріп, таулы жерлерде тұман түсуі мүмкін.
Оңтүстік пен оңтүстік-шығыста күндіз +12…+25 градус жылы болады.
Әсіресе Алакөл маңы мен Жамбыл облысында жел күшейеді. Мұнда желдің екпіні секундына 23–28 метрге дейін жетуі ықтимал.
