Германиядан Ыстанбұлға демалуға барған ерлі-зайыпты мен олардың екі баласы қонақүйдегі жәндіктерге қарсы қолданылған улы заттан қаза тапқан, деп хабарлайды Arasha.kz.
Отбасы қаланың Фатих ауданындағы қонақүйге орналасқан. 12 қарашада олардың жүрегі айнып, құса бастаған. Ауруханаға барған отбасы мүшелері ем алған соң қонақүйге қайтқан. Алайда келесі күні жағдайлары қайта нашарлап, жедел жәрдеммен ауруханаға жеткізілген.
Алты жастағы ұл мен үш жастағы қыз былтыр 13 қарашада көз жұмған. Балалардың анасы келесі күні, ал әкесі 17 қарашада қайтыс болған.
Бастапқыда олардың көшеден сатып алған тағамнан улануы мүмкін деген болжам айтылған. Кейін сараптама бұл нұсқаны жоққа шығарған. Қонақүйден алынған сүлгілер мен басқа да сынамалардан фосфин анықталған. Тергеу отбасының өлімін қонақүйдегі зиянкестерге қарсы жүргізілген өңдеу жұмыстарымен байланыстырған. Сол жерде тұрған тағы екі турист те сырқаттанып, ауруханаға түскен.
Іс бойынша 2026 жылғы 26 маусымда сот үкімі шыққан. Қонақүй иесі мен зиянкестерді жою қызметінің үш өкілі кінәлі деп танылып, 12 жылдан 18 жылға дейін бас бостандығынан айырылған.
