Қазақстан Industrial and Commercial Bank of China (ICBC) арқылы және Қытайдың қарыз нарығында 6 млрд юаньға дейін (Т425,6 млрд астам) қарыз тартуы мүмкін. Бұл туралы Үкімет баспасөз қызметі хабарлады.
Қазіргі уақытта «Өнеркәсіпті дамыту қоры» үшін 1 млрд юаньнан астам несие тарту мүмкіндігі қарастырылып жатыр. Сонымен қатар, 5 млрд юань көлемінде облигациялар шығару арқылы Қытайдың қарыз нарығына шығу жоспарда бар.
Премьер-министр Олжас Бектенов ICBC төрағасы Лю Цзюньмен кездесіп, инвестициялық ынтымақтастықты және ұзақ мерзімді қаржыландыру мәселелерін талқылады. 2024 жылы Қазақстан мен Қытай арасындағы тауар айналымы $44 млрд-қа жетіп, рекорд орнатқан. 2025 жылдың алғашқы төрт айында өсім 3,4%-ды құрады. Қытай — Қазақстан экономикасына инвестиция салатын жетекші бес елдің бірі, жалпы инвестиция көлемі $26 млрд.
Бектенов Қытайдың Қазақстан үшін негізгі сауда-экономикалық және инвестициялық серіктес екенін атап өтті. Ол ел Президентінің инвестиция тарту тапсырмасын еске салып, үкімет халықаралық қаржы институттарымен тығыз жұмыс істеп жатқанын айтты.
ICBC Қазақстанда еншілес банкі арқылы жұмыс істейді — бұл Алматыдағы «Қытайдың Сауда-өнеркәсіп банкі». Банк «Бәйтерек» холдингімен бірлескен жобалар арқылы маңызды салаларды қолдауға қатысып келеді.
Мысалы, 2025 жылғы наурызда ICBC арқылы 430 млн юань Аграрлық несие корпорациясын қаржыландыруға бөлінді — бұл ауыл шаруашылығын тұрақты қаржыландырудағы маңызды қадам болды.
Кездесу барысында Қазақстан үкіметі «жасыл» қаржыландыру мен экспортты қолдау жобаларына ашық екенін атап өтті. Ал Лю Цзюнь ICBC Қазақстанмен ынтымақтастықты кеңейтуге және екі ел бизнесі арасындағы байланысты дамытуға мүдделі екенін айтты. Тараптар бірлескен жобаларды әрі қарай жалғастыруға ниетті екенін растады.
