Алматы облысында орын алған «алып қашу» рәсімі қайғылы оқиғамен аяқталды. Қалыңдық отырған көлік БАКАД тас жолында жол апатына ұшырады.
Апат 24 мамыр күні кешке БАКАД автожолының 36-шақырымында болды. Облыстық полиция департаментінің алдын ала мәліметі бойынша, KIA көлігінің жүргізушісі Mercedes-Benz көлігімен жанасып соқтығысқан. Соққының инерциясынан Mercedes-Benz аударылып кеткен. Соның салдарынан көлік ішіндегі жолаушылардың бірі оқиға орнында көз жұмды.
Қаза тапқан адам — алып қашып келе жатқан қалыңдық болып шықты. Mercedes-Benz көлігінің жүргізушісі мен тағы екі жолаушы түрлі жарақаттармен ауруханаға жеткізілді.
«Кінәлі жүргізуші ұсталып, уақытша ұстау изоляторына қамалды», – деп хабарлады полиция департаментінің баспасөз қызметі.
Жол-көлік оқиғасы бойынша сотқа дейінгі тергеу амалдары жүргізілуде. Оқиғаның барлық мән-жайы анықталып жатыр.
