АҚШ пен Қытай бірнеше ай бойы ушыққан жағдайдан кейін қайта байланыс орната бастады — екі елдің көшбасшылары тарифтерді, сирек кездесетін жер элементтерін (стратегиялық ресурстар) жеткізуді талқылап, бір-біріне қонаққа шақыру жолдады.

«Синьхуа» ақпарат агенттігінің хабарлауынша, Дональд Трамп Қытай Халық Республикасының төрағасы Си Цзиньпинмен телефон арқылы сөйлесті — бұл екі ел арасындағы сауда қатынастары шиеленіскеннен кейінгі алғашқы байланыс. Трамптың айтуынша, әңгіме «өте жақсы және нәтижелі» болған.

АҚШ та, Қытай да мамыр айында қол жеткізілген өзара тарифтерді төмендету туралы келісімді орындаймыз деп уәде етті (АҚШ тарапынан — 145%-дан 30%-ға, Қытай тарапынан — 125%-дан 10%-ға дейін). Бұған дейін Трамп Қытайды стратегиялық шикізат экспорты бойынша прогресс болмағаны үшін келісімді бұзды деп айыптаған еді. Қазір ол бұл бағытта алға жылжу бар екенін мәлімдеді.

«Сирек кездесетін жер элементтерін өндірудің күрделілігіне қатысты ешқандай сұрақтар болмауы тиіс», — деп жазды ол әлеуметтік желіде.

Өз кезегінде, Си Цзиньпин АҚШ-ты Тайвань мәселесі бойынша жанжал туғызбауға және «теріс әрекеттерден» бас тартуға шақырды. Атап айтқанда — микрочиптердің экспортын шектеуді алып тастау және маңызды ғылыми мамандықтар бойынша білім алып жатқан студенттердің визаларын қайтарып алмау туралы айтты.

Си Цзиньпин Трамп пен АҚШ-тың бірінші ханымын Қытайға шақырды, ал Трамп ҚХР төрағасын Вашингтонға шақырды. Кездесулердің нақты күндері әлі белгіленбеген.