Қырғызстан Президентінің міндетін атқарушы, Премьер-министрі Садыр Жапаров қазақ халқына және президент Қасым-Жомарт Тоқаевқа алғыс айтты. Бұл туралы Ақорданң баспасөз қызметі хабарлады.
Бүгін Қырғыз тарапының бастамасымен Қасым-Жомарт Тоқаев пен Садыр Жапаров телефон арқылы сөйлескен. «Әңгімелесу барысында Садыр Жапаров қазіргідей қиын кезеңде Қырғызстанға үнемі қолдау көрсетіп, көмек бергені үшін Қасым-Жомарт Тоқаевқа және жалпы қазақ халқына алғыс айтты» деп жазады президенттің баспасөз қызметі.
Өз кезегінде Қ.Тоқаев: «Біз Қырғызстанның саяси тұрақтылығы мен экономикалық тұрғыдан өсіп-өркендеуіне тілекшіміз. Қазақстан осындай қиын уақытта бауырлас елді әрдайым қолдаған және қолдай береді» деген.
Садыр Жапаров Қырғызстан президенті қызметін уақытша атқарушы және премьер-министрі лауазымдарын тапсырып, президент сайлауына қатысады. Бұл туралы ол бұған дейін ресми мәлімдеген еді.
Бұған дейін Қазақстан мен Өзбекстан президенттері телефон арқылы сөйлесіп, Қырғызстанға көмектесуге уағдаласқан еді.
