Израильде әлеуметтік желілерде Газа секторына жасалған шабуылдарды шекарадан бақылап отырған азаматтардың бейнелері қайтадан қызу талқыға түсті. Израильдіктер шекара маңында арнайы лагерьлер құрып, шабуылдарды тікелей бақылап отыр.
Бұл жағдай ел ішіндегі палестиналықтарға қатысты күш қолдануға деген қатынастың өзгеріп жатқанын көрсетеді. Haaretz басылымы жариялаған Пенсильвания университетінің зерттеуіне сәйкес, Израиль қоғамында зорлық-зомбылықты қолдау деңгейі алаңдатарлық көрсеткішке жеткен.
Израильдік еврейлердің 82%-ы палестиналықтарды Газа секторынан күшпен шығарып жіберуді қолдайтынын мәлімдеген.
Бұдан да сорақысы — респонденттердің 47%-ы жаулап алынған аумақтағы бейбіт палестиналықтарды толықтай жою идеясын қолдайтынын айтқан. Бұл көзқарасты олар Иерихонды алу кезіндегі библиялық мысалмен негіздеген.
Сарапшылардың айтуынша, бұл деректер Израиль қоғамындағы гуманитарлық құндылықтарға қатысты терең дағдарыстың бар екенін аңғартады. Адам құқықтары мен бейбіт тұрғындарды қорғауға қатысты халықаралық нормалар тұрғысынан мұндай ұстанымдар қауіпті тенденцияны білдіреді.
Сонымен қатар, шекара маңында шабуылдарды тамашалау мақсатында лагерьлердің құрылуы — қақтығыстарды шоуға айналдыру, зорлықты қалыпты құбылыс ретінде қабылдаудың белгісі ретінде қарастырылуда.
