23 шілде, Иерусалим — Израиль парламенті Кнессет Иордан өзенінің Батыс жағалауына, нақтырақ айтқанда Иудея, Самария және Иордан аңғарына, Израильдің егемендігін кеңейту туралы декларация қабылдады. Бұл аумақтар қазіргі таңда әскери бақылауда, ал декларация Израиль заңдарын бұл аймақтарға да қолдануды көздейді. Бұл туралы The Jerusalem Post басылымы хабарлады.
Дауыс беру нәтижесі:
Қолдағандар: 71 депутат
Қарсы болғандар: 13 депутат
Қолдау көрсеткендердің қатарында оппозициялық «Біздің үйіміз – Израиль» партиясының 6 мүшесі және жақында ғана коалициядан шыққан «Тора еврейлігі» партиясының 4 өкілі болды.
Дегенмен, декларация заңдық күшке ие емес, яғни бұл – символикалық қадам. Ол үкіметті міндеттемейді, бірақ саяси мәлімдеме ретінде қабылдануда.
Құжатта 2023 жылғы 7 қазандағы шабуылдарға сілтеме жасалып, Палестинаның дербес мемлекет ретінде құрылуы Израиль үшін «экзистенциалды қауіп» екені айтылған.
Оппозиция жетекшісі Яир Лапид бұл қадамды "нағыз саяси дағдарыс жағдайында халықтың назарын басқаға бұру әрекеті" деп атады. Ол премьер-министр Биньямин Нетаньяхудың шетел істері және қорғаныс комитетінің төрағасын отставкаға жібермек болғанын сынға алды. Айтуынша, бұл шешім комитет басшысының әскер қатарына шақырудан жалтаруға көмектесуден бас тартқанымен байланысты болған.
