Ресми Баку AZAL әуе компаниясының ұшағын атып түсіруге Ресейдің жауапты екенін мәлімдеп, жауапкершілікті мойынға алуды талап етті, деп хабарлайды Arasha.kz.
Әзербайжан тарапы Ақтауда құлаған AZAL ұшағын ресейлік әскери күштердің атып түсіргенін дәлелдейтін барлық айғақтардың бар екенін айтты.
Енді Баку Мәскеуден бұл қайғылы оқиға үшін жауапкершілік алуды күтеді. Бұл туралы Әзербайжан президентінің көмекшісі Хикмет Гаджиев мәлімдеді.
Оның айтуынша, Ресей мен Әзербайжан арасындағы қарым-қатынаста түбегейлі өзгерістер болмағанымен, соңғы айларда өзара түсініспеушілік пен шиеленістің күшейгені байқалып отыр.
— Мұндай оқиғалар көршілес елдер арасында да орын алуы мүмкін. Барлығы әзербайжан қоғамын терең күйзелткен әуе апатынан басталды. Бұл оқиға Ресей аумағында, Ресейдің әуе кеңістігінде орын алды және оның қалай болғаны бізге мәлім — бұл құпия емес. Әзербайжан көрші әрі серіктес ел ретінде Ресей бұл іске қатысты жауапкершілік алып, әділеттілікті қамтамасыз етеді деп күтеді, — деді Гаджиев.
2024 жылғы 25 желтоқсанда Бакуден Грозныйға ұшып шыққан ұшақ Ақтау маңында апатқа ұшыраған еді.
Көп ұзамай Ресей бұл оқиғаға байланысты тергеу тобы құрылғанын хабарлаған болатын, алайда тергеу нәтижелері жөнінде әлі күнге дейін ақпарат берілген жоқ.
Апат болған сәтте ұшақ бортында 62 жолаушы мен 5 экипаж мүшесі болған, олардың 29-ы аман қалған.
