Қазақстан билігі Еуроодақпен келіссөздер жүргізіп, Ресей порттары арқылы Еуропа елдеріне қазақстандық көмірді тасымалдауға салынған тыйымды жоюға қол жеткізді. Бұл туралы ҚР Сауда және интеграция министрлігінің баспасөз қызметі хабарлады.
Министрлік мәліметінше, бірқатар ресейлік порттарға қатысты шектеулерді алып тастау үшін ЕО тарапынан бірнеше шарт қойылған. Атап айтқанда:
көмірдің тек Қазақстанда өндірілген болуы;
жүктің иесі санкцияға ұшыраған елдердің резиденті болмауы;
порттар тек транзит, тиеу немесе жөнелту мақсатында ғана пайдаланылуы тиіс.
Ведомство бұл шаралар Қазақстанның көмірін Еуропаға экспорттауды қалпына келтіруге және логистикалық маршруттардың тұрақтылығын қамтамасыз етуге көмектеседі деп есептейді.
Сауда министрлігі атап өткендей, 2025 жылғы ақпанда енгізілген ЕО-ның Ресейге қарсы 16-санкциялық пакеті Қазақстан көмірінің экспортына елеулі қауіп төндірген. Мысалы, Усть-Луга порты — қазақстандық көмірдің Еуропаға транзиті үшін тарихи маңызға ие нысан — бұл шектеулердің салдарынан жұмысын тоқтатқан.
2024 жылы Қазақстан ЕО елдеріне 5,2 млн тонна көмір экспорттаған — бұл жалпы экспорттың 51,8%-ын құрады. Ал 2025 жылғы қаңтар–мамыр аралығында көрсеткіш 1,6 млн тонна немесе 38,5%-ға дейін төмендеген.
