Қазақстан Президенті Қасым-Жомарт Тоқаев III Стратегиялық серіктестер форумында сөз сөйлеп, еліміздің тәуелсіздік жылдарындағы жетістіктері мен соңғы жеті жылда жүргізілген реформаларға тоқталды. Мемлекет басшысы Қазақстанның халықаралық беделі артып, мемлекеттілігі нығайғанын атап өтті, деп хабарлайды Arasha.kz.
Президент форум қатысушыларына арнаған сөзінде бұл басқосудың Қазақстан үшін маңызды тарихи кезеңде өтіп жатқанын жеткізді. Ол биыл еліміздің тәуелсіз мемлекет болғанына 35 жыл толатынын атап өтіп, осы уақыт ішінде Қазақстанның қалыптасу және даму жолында елеулі жетістіктерге қол жеткізгенін айтты.
"Жер жүзінің ең зияткер тұлғаларын ортақ мүддеге жұмылдырған бұл алқалы жиын еліміз үшін тарихи сәтте өтіп жатыр. Биыл Қазақстанның дербес мемлекет болғанына – 35 жыл", – деді Қасым-Жомарт Тоқаев.
Мемлекет басшысы өз сөзінде тәуелсіздік жылдарындағы ел дамуына ерекше назар аударды. Президенттің пікірінше, Қазақстан халықаралық аренада беделі қалыптасқан, экономикалық әлеуеті жоғары мемлекет ретінде дамып келеді.
"Еліміз қасиетті Тәуелсіздігіміздің мерейлі межесіне халықаралық беделі биік, экономикалық әлеуеті зор, болашағы жарқын ел, сондай-ақ аймақта көш бастап тұрған және дүние жүзінде жаппай мойындалған озық мемлекет ретінде жетіп отыр", – деді Президент.
Оның айтуынша, мемлекет дамуының негізгі тіректерінің бірі – ел ішіндегі бірлік пен қоғамдық тұрақтылық. Тәуелсіздік жылдарында Қазақстан түрлі сын-қатерді еңсеріп, мемлекеттілігін нығайта түсті.
Президент елдің өткен 35 жылдағы жетістіктерін халықтың ынтымағы мен бірлескен еңбегімен байланыстырды.
"Халқымыз осы жылдар ішінде көптеген белесті табысты еңсерді. Біртұтас жұртымыздың бірлігі күшейіп, мемлекеттігіміз нығайды. Осылайша, Ұлы даладағы бірегей өркениетіміз қайта жаңғырды", – деді Қасым-Жомарт Тоқаев.
Мемлекет басшысы ұлттық құндылықтардың жаңғыруы мен мемлекеттіліктің нығаюын тәуелсіздік кезеңіндегі маңызды нәтижелердің қатарында атады.
Қасым-Жомарт Тоқаев форумда соңғы жеті жылда Қазақстанда қолға алынған өзгерістерге де тоқталды. Президенттің айтуынша, бұл кезеңде ел өмірінің түрлі саласын қамтыған ауқымды реформалар жүргізілген.
"Соңғы жеті жыл ішінде Қазақстанда ауқымды реформалар жүзеге асырылды. Бұл да – тарихымызда бұрын-соңды болмаған оқиға. Аталған өзгерістер тұтас халқымыздың өміріне, бүкіл қоғамның болмысына оң ықпал етуде десек, артық болмас", – деді Мемлекет басшысы.