Контентке өту
Қазақстан Тәуелсіздігіне 25 жыл
Жаңалықтар Қоғам Саясат Аймақтар Спорт Мәдениет Әлем Денсаулық Ғылым Тарих Экономика Қаржы
Саясат

Тоқаев ҰҚК-нің жаңа төрағасына тапсырма берді

Тоқаев ҰҚК-нің жаңа төрағасына тапсырма берді
Фото: Ақорда

Қазақстан президенті Қасым-Жомарт Тоқаев Ұлттық қауіпсіздік комитетінің жаңа төрағасы Марат Ирменовке бірқатар маңызды міндет жүктеді. Мемлекет басшысы ведомство жұмысын реформалап, сыбайлас жемқорлыққа қарсы күресті күшейтуді тапсырды, деп хабарлайды Arasha.kz.

16 қарашада Қасым-Жомарт Тоқаев Ұлттық қауіпсіздік комитетінің басшылық құрамымен жиын өткізді. Кездесу барысында Президент ведомствоның жаңа төрағасы Марат Ирменовті таныстырып, ұлттық қауіпсіздік органдарының алдағы жұмысына қатысты негізгі басымдықтарды белгіледі.

Мемлекет басшысы ҰҚК қызметін заман талабына сай жетілдіру қажеттігін атап өтті. Оның айтуынша, ведомство жұмысының тиімділігін арттыру үшін қалыптасқан тәсілдерді қайта қарастырып, жаңа жұмыс тетіктерін енгізу маңызды.

"Президент ұлттық қауіпсіздік органдары жүйесін реформалау, ведомство алдына қойылған мақсаттарға жетудің жаңа тәсілдерін әзірлеу және қызмет тиімділігін арттыру қажеттігіне тоқталды", – делінген Ақорда хабарламасында.

Сонымен қатар Қасым-Жомарт Тоқаев ұлттық қауіпсіздік органдары "Заң мен Тәртіп" қағидатын қамтамасыз етуге ерекше көңіл бөлуі керектігін айтты. Президенттің тапсырмасына сәйкес, ҰҚК мемлекеттің экономикалық мүдделерін қорғау, сыбайлас жемқорлық пен өзге де заң бұзушылықтардың алдын алу бағытындағы жұмысын күшейтуге тиіс.

Мемлекет басшысы әсіресе маңызды мемлекеттік бағдарламаларды іске асыру кезінде жемқорлық тәуекелдерін болдырмауға назар аударды. Бұл ретте құқық бұзушылықтарды анықтаумен ғана шектелмей, олардың алдын алатын профилактикалық шараларды күшейту қажеттігі айтылды. Бұдан бөлек, Президент Ұлттық қауіпсіздік комитетіндегі кадрларды іріктеу тәртібін жетілдіруді тапсырды.