DAR Team командасының бас бапкері, Шавкат Рахмоновпен бірге жұмыс істейтін Эдуард Базров қазіргі таңда UFC-дегі ең жарқын жекпе-жекшіні атап өтті, деп Arasha.kz тілшісі Sportinside.kz сайтына сілтеме жасап хабарлайды.
Базровтың айтуынша, бүгінгі күннің сөзсіз басты жұлдызы – Илия Топурия.
"Қазіргі таңда UFC-дің сөзсіз басты жұлдызы – Илия Топурия. Ол жекпе-жектерін өте әсерлі өткізеді, кездесулерді жарқын аяқтайды. Өзінің стилі, өзіне тән аурасы, есте қаларлық бейнесі бар. Ол бәрін жасай алады: күресе де алады, соққы да жасайды, нокаутқа жібереді, сабмишнмен де жеңеді. Сондықтан, менің ойымша, дәл қазір ол – UFC-дің басты жұлдызы. Барлығы Топурия жайлы айтып жүр, әлеуметтік желілерде ол туралы жаңалықтар көп. Оның жекпе-жек сәттері, оқиғалары барлық жерде жарияланып жатыр, – деді Эдуард Базров.
Айта кетсек, Илия Топурия бүгінде салмақ дәрежесіне қарамастан, әлемнің үздік жекпе-жекшілері рейтингінде бірінші орында тұр. Соңғы айқасында ол екінші дивизионда чемпиондық белбеуді иеленіп, Чарльз Оливейраны алғашқы раундта нокаутқа жіберген еді.
