Алматы қалалық әкімшілік соты Бостандық ауданында ашылайын деп жатқан №215 мектепті аралас мектеп етуге қарсы шыққан белсенді Дархан Ардақұлын 15 тәулікке қамады, деп хабарлайды Arasha.kz.
"Мені 15 күнге соттап жіберді, 488 бап, 7 тармақ бойынша “мектепке барамыз” деген сөзімді митингке шақырдың деп айыптады. #215 мектеп қазақ болуын талап етемін. Ешнәрсеге өкінбеймін" - деп жазды белсенді Фейсбуктегі парақшасында.
Сот шешімінде 19 тамызда Дархан Ардақұлы "бейбіт жиын өткізу тәртібі туралы" заңды бұза отырып, жергілікті органның рұқсатынсыз бейбіт жиналыс өткізуге шақырғаны" жазылған. Белсенді сотта айыппен келіспеген, деп жазды Азаттық радиосы.
Белсенділер мен ата-аналардың сөзінше, Бостандық ауданында биыл ашылайын деп жатқан жаңа №215 мектеп бастапқыда қазақ тілінде ашылады деп хабарланған, бірақ ашылуы әбден тақалған кезде жергілікті билік өкілдері "айнып қалған". Facebook-та тараған видеолардың бірінде белсенділер бұл ықшамауданда қазақ тілінде оқытатын жалғыз мектеп барын, балаларын қазақ мектебіне бергісі келетін ата-аналар мектеп таппай қиналып отырғанын айтады.
