Белгілі әнші, халықтың сүйіктісі Қарақат Әбілдина тыңдармандарына жаңа еңбегін – "Қарақат салған қанатты ән" атты кітабын ұсынды, деп хабарлайды Arasha.kz.
Бұл жинақ жетіген аспабына арналуымен ерекшеленеді. Кітапқа Қарақат Әбілдинаның көне аспаппен орындаған 32 туындысының мәтіні мен нотасы енгізілген. Сонымен қатар әр шығарманың QR-коды арқылы аудионұсқасын тыңдауға мүмкіндік бар.
"Бұл кітап – жетігенде ойнауды үйренгісі келетін жас өнерпаздар мен музыка пәні мұғалімдеріне үлкен көмек болады деп ойлаймын. Бұл – тек менің шығармашылығым емес, қазақ руханиятына қосқан шағын үлесім. Өнер жолында өз үнімді қалдыру бала күнгі арманым еді. Бұл еңбек – сол арманымның орындалған сәті", – деді әнші.
Жаңа кітаптың тұсаукесеріне қоғам қайраткерлері, мәдениет пен өнер өкілдері және ұлттық өнерді қолдаушылар қатысты.
