Алматы маңындағы Көкжайлау шатқалында өткен сенбілік табиғатты қорғаудың қаншалықты маңызды екенін тағы бір еске салды. 28 тамыз күні ұйымдастырылған бұл шараға “Қазавиқорғау” мекемесі, “Samal Water” компаниясы және ондаған ерікті қатысып, шатқалды тұрмыстық қалдықтан тазартты. Жергілікті табиғи ландшафтты сақтау — экологиялық мәдениеттің бір бөлігі, ал мұндай бастамалар болашақ ұрпаққа таза табиғатты жеткізуге жасалған қадам екені сөзсіз.
Алайда бір шындықты жасырмай айту керек: Көкжайлауды ең алдымен өзіміз ластап отырмыз. Жаңа қоқыс үйінділерін әкеліп тастайтын да, табиғат аясында демалып жүріп қалдықтарын жинамай кететін де — сырттан келгендер емес, өзіміздің азаматтар. Бұл тек ұят қана емес, адамгершілікке жат қылық. Туризмді дамытамыз десек, ең алдымен өзіміздің қарапайым тазалық мәдениетімізді жолға қоюымыз қажет. Шетелден келетін қонақтарға қоқысқа толы шатқалды көрсетіп, экотуризмді дамыту мүмкін емес.
Сондықтан Көкжайлау сияқты ерекше аймақтарға барғанда әрқайсымыз өзімізден бастауымыз керек. Табиғатты таза ұстау — бір күндік сенбіліктің емес, күнделікті дағдымыздың бөлігіне айналуы тиіс. Тек сол кезде ғана туризмнің дамуы жай ұран емес, нақты нәтижесі бар бағытқа айналады.
