АҚШ президенті Дональд Трамптың жағдайы жақсы. Бұл туралы әлеуметтік желілерде тараған қызу талқылауларға байланысты америкалық шенеуніктер мәлімдеді, деп хабарлайды Arasha.kz.
Олардың айтуынша, мемлекет басшысы таңертеңгісін гольф ойнауға кеткен.
"Трампта бәрі дұрыс. Ол бүгін таңертең гольф ойнап жүр", – делінген ресми мәлімдемеде.
Бұл ақпарат кейіннен Х желісінде жарияланды.
Америкалық БАҚ өкілдері де Ақ үйдің баспасөз пулына сілтеме жасап, президенттің ақ түсті поло жейде мен қызыл кепкада кортежбен шыққанын хабарлады. Дегенмен, суреттер ресми түрде жарияланбаған.
Қауесет қайдан шықты?
Бұған дейін әлеуметтік желілерде "Дональд Трамп қайтыс болды" деген хабарламалар жылдам тараған еді. #TrumpIsDead хэштегі Х (Twitter) желісінде трендке шығып, ондаған мың жазба жинады. Бірақ ресми дерек расталмады. Бұл жағдай АҚШ президентінің денсаулығына қатысты алып-қашпа әңгімелердің, оның вице-президенті Джей Ди Вэнстің мәлімдемелерінің және "Симпсондар" мультсериалының болжамдарына қатысты тараған вирустық тренд болуы мүмкін.
