Мысыр билігі Каирдегі басты археологиялық музейден жоғалып кеткен 3000 жылдық алтын білезікті іздеп жатыр. BBC хабарлауынша, артефакт Аменемопе патша билік құрған кезеңге тиесілі (б.з.д. 993–984 жж.).
Жоғалған зергерлік бұйым – алтыннан жасалған, лазуриттен ойылған моншақтармен әшекейленген сирек кездесетін білезік. Ол алғашында Мысыр музейінің қалпына келтіру зертханасында сақталған.
Елдің Ежелгі жәдігерлер істері жөніндегі министрлігі артефакттың жоғалуына байланысты дереу шара қабылдағанын және істің полицияға берілгенін мәлімдеді. Сондай-ақ білезіктің суреті барлық әуежай, теңіз порты мен құрлық шекара бекеттеріне жіберілген. Мақсат – оны елден жасырын шығару әрекетінің алдын алу.
Министрлік артефакт жоғалғаны туралы жариялауды әдейі кешіктіргенін атап өтті. Бұл – тергеудің тиісті деңгейде жүргізілуін қамтамасыз ету үшін жасалған қадам. Алайда зергерлік бұйымды соңғы рет қашан көргендері белгісіз.
Al-Misri al-Yawm басылымының хабарлауынша, жоғалудың беті жуырда ашылған. Музей қызметкерлері ондаған артефактіні Римге, келесі айға жоспарланған көрмеге жіберуге дайындалып жатқан кезде білезіктің жоқ екені белгілі болған.
Каирдегі Мысыр музейі – Таяу Шығыстағы ең көне археологиялық мекеме. Мұнда 170 мыңнан астам жәдігер сақталған, олардың ішінде Аменемопенің алтындатылған ағаштан жасалған жерлеу маскасы бар.
Бұл оқиға Гиза қаласында ашылуы жоспарланған Ұлы Египет музейінің ресми ашылуына алты апта қалғанда орын алып отыр. Жаңа музейде әйгілі Тутанхамонның қабірінен табылған қазыналар жұртшылыққа ұсынылмақ
