Ресейден Қытайға электр энергиясын жеткізу 1 қаңтардан бастап тоқтатылды, өйткені ресейлік экспорттық бағалар Қытайдың ішкі бағаларынан жоғары болып кетті, деп хабарлайды Arasha.kz.
Экспорттық бағалардың көтерілуі нәтижесінде Ресейден жеткізілетін энергия Қытай үшін тартымсыз бола бастады. Қытайға бағытталған электр энергиясының негізгі көлемі Қиыр Шығыстан, негізінен «РусГидро» су электр станцияларынан келетін.
«Интер РАО» мен Қытайдың Мемлекеттік электр желісі корпорациясы арасындағы келісімшарт 2012 жылы жасалған және 2037 жылға дейін есептелген. Осы келісім аясында жыл сайын шамамен 4 миллиард кВт•сағ энергия жеткізу жоспарланған болатын. Алайда, жеткізілімдердің уақытша тоқтатылғанына қарамастан, тараптар келісімшартты бұзуға ниетті емес.
«Интер РАО» компаниясы келісімшарттың күшінде қалатынын және екі тарап та оны тоқтатуды жоспарлап отырмағанын түсіндірді. Сонымен қатар, компания Қиыр Шығыста электр энергиясын тұтыну көлемі артып келе жатқанын, бұл тапшылыққа әкеліп, Қытайға экспорттау көлемінің төмендеуіне себеп болғанын атап өтті.
