Финляндияда 30 жыл бойы үйдегі мұздатқышта сақталған ер адам мен әйелдің мәйіті жер қойнына тапсырылды. Бұл туралы фин ұлттық телерадио компаниясы Yle хабарлады, деп жазады Arasha.kz.
Мұздатқышта сақтаудың себебі
Мәйіттерді 80 жастағы зейнеткер, бұрын дәрігер болып жұмыс істеген азамат сақтаған. Ол ата-анасының денесін 1994 және 1995 жылдардан бері үйіндегі мұздатқышта ұстағанын, мұның бәрі марқұмдардың соңғы өсиетіне сай жасалғанын айтқан. Ер адам отбасы мүшелерінің барлығы бір зиратқа бірге жерленуін қалаған. Оның жоспарына сәйкес, болашақта өзі қайтыс болған соң, ата-анасымен қатар бауыры да сол жерге жерленуі тиіс болған. Осы мақсатта ол отбасылық зират ашуға ресми өтініш те берген.
Мәйіттердің табылуы және заңдық салдары
Марқұмдардың денесі 2024 жылдың қыркүйегінде жеке үйден табылған. Осыдан кейін үй иесіне «марқұмдарды қорлау» бабы бойынша айып тағылды. Себебі Финляндия заңнамасына сәйкес, мәйіттерді арнайы орындардан тыс ұзақ уақыт сақтау заң бұзушылық болып саналады. Жергілікті билік марқұмдарды жерлеу туралы шешім шығарғанымен, зейнеткер бұл шешімге қарсы сотқа жүгініп, отбасылық жерлеуді өзі ұйымдастыру үшін уақыт ұтуға тырысқан.
