Елнұр Бейсенбаев Қазақстан Республикасы Президенті Әкімшілігінде жаңа лауазымға тағайындалды, деп хабарлайды Arasha.kz.
"Мемлекет басшысының өкімімен Бейсенбаев Елнұр Сабыржанұлы Қазақстан Республикасы Президенті Әкімшілігінің Ішкі саясат бөлімі меңгерушісі болып тағайындалды", – делінген ресми хабарламада.
Елнұр Бейсенбаевтың өмірбаяны
Елнұр Бейсенбаев 2008 жылы әл-Фараби атындағы Қазақ ұлттық университетін "Саясаттану" мамандығы бойынша тәмамдап, бакалавр дәрежесін алған. 2010 жылы осы оқу орнында "Саясаттану" мамандығы бойынша магистратураны аяқтаған.
2006-2012 жылдары "Жастар Үні" қоғамдық бірлестігінде түрлі басшылық қызметтер атқарып, ұйымдастыру бөлімінің кеңесшісі әрі жастар қанатының төрағасы болған.
2012-2015 жылдары Алматы қаласындағы №48 мектеп-лицейінде тарих пәнінің мұғалімі болып еңбек етіп, сонымен қатар Қазақстан Коммунистік халық партиясының Алматы қалалық филиалы жанындағы қоғамдық бірлестікте идеология және үгіт-насихат жөніндегі хатшы қызметін атқарған.
2015-2017 жылдары Алматы қаласы жастар саясаты басқармасының жастар жобалары және ұйымдастыру жұмысы бөлімін, кейіннен аталған басқарманы басқарды.
2017-2018 жылдары Абай атындағы Қазақ ұлттық педагогикалық университетінің тәрбие, әлеуметтік жұмыс және жастар саясаты жөніндегі департамент директоры болды.
2019-2020 жылдары Астана қаласы әкімінің кеңесшісі қызметін атқарды. 2020-2021 жылдары "Jas Otan" жастар қанатының төрағасы болды.
2021-2023 жылдары Қазақстан Республикасы Парламенті Мәжілісінің VII шақырылымының депутаты болып, Әлеуметтік-мәдени даму комитетінің құрамында жұмыс істеді.
Сондай-ақ ол Amanat партиясының атқарушы хатшысы қызметін атқарған.
2023 жылғы 28 наурыздан бастап Amanat партиясының тізімі бойынша Қазақстан Республикасы Парламенті Мәжілісінің VIII шақырылымының депутаты болып сайланған.
