Әлеуметтік желілерде «Нетаньяху мен Трампқа көрсетілген Хаменеи сарайынан түсірілген фото» деген сипаттамамен сурет тарады. Бұл кадрлар Иран Ислам Республикасының Жоғарғы көсемі Әли Хаменеидің қазасына қатысты ақпараттар аясында қызу талқыланып жатыр, деп хабарлайды Arasha.kz.
Еске салайық, 28 ақпанда бірқатар БАҚ Хаменеидің қаза тапқаны туралы хабар таратты. Бұл ақпаратты Иранның мемлекеттік агенттіктері — Tasnim, IRNA, ISNA, Mehr және Fars растаған.
Ресми мәліметке сәйкес, Ислам революциясының Жоғарғы жетекшісі өз жұмыс орнында — Көшбасшылар үйінде болған кезде қаза болған. Иран үкіметі мен Ислам революциясы сақшылар корпусы (КСИР) оның Израиль мен АҚШ жасаған әуе соққыларының салдарынан көз жұмғанын мәлімдеді.
Осы оқиғаға байланысты елде 40 күндік жалпыұлттық аза тұту жарияланып, 7 күн демалыс күні болып бекітілді.
Иран үкіметінің ресми мәлімдемесінде:
«Ислам үмбетіне және әлемдегі еркін халықтарға сүйене отырып, біз бұл ауыр қылмысты жасаған әрі ұйымдастырған тұлғаларды өз әрекеттеріне өкіндіреміз», – делінген.
Сонымен қатар, КСИР өкілдері алдағы уақытта «Иран Қарулы Күштері тарихындағы ең ауқымды шабуыл операциясы» басталуы мүмкін екенін хабарлады.
Сарапшылардың бағалауынша, бұл оқиға Таяу Шығыстағы геосаяси ахуалды одан әрі шиеленістіруі ықтимал. Аймақтағы тұрақсыздық артып, халықаралық қауымдастық жағдайды жіті бақылауда ұстап отыр.
Қазіргі таңда таралған суреттер мен ақпараттардың шынайылығы және олардың ықтимал салдары кеңінен талқылануда.
