Иран Қарулы күштері америкалық әскерилердің атып түсірілген ұшқышты эвакуациялау әрекетінің жолын кесіп, елдің орталық бөлігінде жүргізілген операция барысында АҚШ-тың бірнеше әуе техникасын жойған. Бұл туралы Tasnim агенттігі Иранның "Хатам әл-Анбия" орталық штабының ресми өкіліне сілтеме жасап хабарлады.
Өкілдің айтуынша, оқиға америкалық күштердің "ұшқышты алып кетуге бағытталған үмітсіз әрекеттерінен" кейін орын алған. Иран тарапынан ұйымдастырылған бірлескен операцияға әуе-ғарыш күштері, құрлық әскері, "Басидж" еріктілер жасағы мен құқық қорғау органдары қатысқан.
Нәтижесінде жақындап келе жатқан әуе құралдары дер кезінде анықталып, залалсыздандырылған. Мәліметке сәйкес, екі Black Hawk тікұшағы мен бір C-130 әскери-көлік ұшағы атып түсірілген.
Сондай-ақ дереккөз АҚШ президенті Дональд Трамп бұл оқиғаның маңызын төмендетуге тырысқанын атап өтті. Ол әлеуметтік желідегі жазбасында бұл әрекетті атып түсірілген ұшқышты құтқару бойынша арнайы операция ретінде сипаттаған.
