Швейцариялық Swiss International Air Lines әуе компаниясына тиесілі Airbus A350 ұшағы Қазақстан аумағы үстінде ұшу кезінде дабыл белгісін берген. Flightradar24 сервисінің мәліметінше, борт Балқаш маңында болған және кейін Алматыға қарай бағытын өзгерткен, деп хабарлайды Tengri Travel.
Әңгіме Сеулден Цюрихке бағыт алған LX123 рейсі туралы болып отыр. Ұшақ HB-IFB тіркеу нөмірімен тіркелген әуе кемесімен орындалған.
Ұшу барысын бақылау сервистерінің дерегіне сәйкес, ұшақ Squawk 7700 кодын жіберген. Бұл – бортта төтенше жағдай туындағанын білдіретін халықаралық дабыл сигналы. Аталған код нақты қандай мәселе болғанын көрсетпейді, бірақ диспетчерлерге әуе кемесіне шұғыл назар аудару қажеттігін білдіреді.
Жарияланған сәтте Flightradar24 платформасында бұл рейсті шамамен 9 мың адам бақылап отырған.
Алдын ала ақпарат бойынша, ұшақ Алматы әуежайына жергілікті уақытпен шамамен 12:50-де сәтті қонған.
Қазіргі уақытта дабыл белгісінің берілу себебі ресми түрде нақтыланбады.
