Қырғыз Республикасының Бас прокуратурасы Ұлттық қауіпсіздік мемлекеттік комитетінің бұрынғы басшысына қатысты іс бойынша айыптау актісін бекітті, деп хабарлайды Arasha.kz.
Бұл туралы адвокат Икрамидин Айткулов мәлімдеді. Оның айтуынша, Қамшыбек Ташиевке «билікті күшпен басып алуға дайындалу» және «лауазымдық өкілеттіктерін асыра пайдалану» баптары бойынша айып тағылып отыр.
Айта кетейік, сәуір айының соңында тағы бір заңгер - Шердор Абдыкапаров - Ташиев мемлекеттік төңкеріс жасауға әрекеттенді деп айыпталғанын хабарлаған болатын. Кейінірек адвокат өз сөзінен бас тартып, қателескенін түсіндірді.
Қазіргі мәліметтерге қарағанда, Ташиевке қатысты материалдар Бішкектің Бірінші май аудандық сотына берілген. Арнайы қызметтің бұрынғы басшысымен бірге бұл іс бойынша тағы жеті адам өтіп жатыр.
Адвокаттың айтуынша, іске «құпия» грифі берілген. Бұл сот отырыстары жабық режимде өтетінін, ал тергеу мен сот материалдарын жариялауға тыйым салынатынын білдіреді.
Ықтимал айыптар туралы ақпарат шыққаннан кейін Ташиевтің өзі кінәсіз екенін және ел заңнамасы аясында қорғанатынын мәлімдеді.
