Иран футбол федерациясы 2026 жылғы әлем чемпионаты кезінде ұлттық құрамаға жасалып отырған шектеулерге байланысты ФИФА-ға ресми шағым жолдамақ, деп хабарлайды Arasha.kz.
Reuters мәліметінше, бұған АҚШ билігінің ирандық футболшылардың ел аумағына кіріп-шығуына қатысты қатаң талаптары себеп болған. Саяси жағдай мен виза мәселелеріне байланысты Иран құрамасы қазір Мексикада орналасуға мәжбүр.
АҚШ тарапы ирандық футболшыларға елге тек матч өтетін күніне жақын уақытта кіруге рұқсат берген. Нақтырақ айтқанда, команда ойынға 24 сағат қалғанда ғана АҚШ аумағына кіріп, кездесу аяқталған соң бірден елден шығуы тиіс.
Иран құрамасының бас бапкері Амир Галенои бұл шешімге наразылық білдірді. Оның айтуынша, мұндай жағдай команданы басқа қатысушылармен салыстырғанда теңсіз әрі қолайсыз күйге түсіріп отыр.
Иран футбол федерациясы бұл шектеулер спорттағы әділдік пен барлық командаға тең мүмкіндік беру қағидаларына қайшы деп санайды.
Бапкерлер штабы футболшылардың ауа райы мен уақыт айырмашылығына бейімделуі үшін ойын өтетін қалаға екі күн бұрын баруды жоспарлаған. Алайда АҚШ бұл өтінішті қабылдамаған. Иран тарапы мұндай жағдай Жаңа Зеландияға қарсы алғашқы матчқа дайындыққа кері әсер еткенін айтты. Ол кездесу 2:2 есебімен аяқталған.
Әзірге ФИФА мен АҚШ-тың Ішкі қауіпсіздік министрлігі бұл мәселеге қатысты ресми түсініктеме берген жоқ.
Шектеулерге қарамастан, Иран құрамасы әлем чемпионатындағы келесі ойындарына дайындалып жатыр. Команда 21 маусымда Лос-Анджелесте Бельгиямен, ал 27 маусымда Сиэтлде Мысыр құрамасымен кездеседі.
