Талдықорғанда 14 жастағы жасөспірім ашық жатқан терең құдыққа құлап кетті. Оқиға түнгі уақытта болған, деп хабарлайды Arasha.kz.
Полиция мәліметінше, түнгі сағат 00:00 шамасында қыз шамамен төрт метр тереңдіктегі ашық құдыққа түсіп кеткен.
Оқиға орнына патрульдік полиция ротасының қызметкерлері, сондай-ақ "Бүркіт-163" және "Бүркіт-164" экипаждары жедел жеткен.
Тәртіп сақшылары жасөспірімді арқанның көмегімен құдықтан аман-есен шығарып алды. Кейін қыз дәрігерлердің қарауына берілді.
Оқиғадан соң қауіпті құдықты жабу бойынша тиісті шаралар қабылданған. Сонымен қатар жасөспірімнің ата-анасымен профилактикалық түсіндіру жұмыстары жүргізілді.
