Белгілі дінтанушы Нұрлан Байжігітұлы өзіне және екі орынбасарына діни насихат жүргізуге құқық беретін ресми миссионерлік куәлік табысталғанын мәлімдеді, деп хабарлайды Arasha.kz.
Имамның айтуынша, құжат Қазақстан Республикасының "Діни қызмет және діни бірлестіктер туралы" заңының талаптарына сәйкес рәсімделген.
Куәлік қандай құқық береді?
Қолданыстағы заңнама бойынша Қазақстан аумағында діни ілім таратып, миссионерлік қызметпен айналысу үшін жергілікті атқарушы органда ресми тіркеуден өту қажет.
Нұрлан Байжігітұлының сөзінше, берілген куәлік мешітте ғана емес, интернет пен әлеуметтік желілерде де діни мазмұндағы уағыз-насихат жүргізуге құқық береді.
"Қазақстанда тұңғыш рет "Діни қызмет және діни бірлестіктер туралы" заңның 8-бабының 1-тармағына сәйкес, дін таратуға, насихат айтуға, оның ішінде ғаламторда миссионерлік қызмет жүргізуге құқық беретін куәлік ресми түрде табысталды", – деп жазды имам.
Рұқсат үш дін қызметкеріне берілген
Нұрлан Байжігітұлының мәлімдеуінше, ресми құжат өзіне және екі наиб-имамға берілген.
Олар – Берік Арын мен Сұңғат Саметов.
Имам бұл ислам бағыты бойынша дін қызметкерлеріне берілген алғашқы осындай ресми рұқсат екенін атап өтті. Алайда оның "Қазақстанда алғаш рет берілгені" жөніндегі мәлімет Нұрлан Байжігітұлының өз мәлімдемесіне негізделіп отыр.
