Бүгін, 27 шілдеде қазақтан шыққан тұңғыш ғарышкер, Халық Қаһарманы, Кеңес Одағының Батыры, авиация генерал-майоры Тоқтар Әубәкіров 80 жасқа толды, деп хабарлайды Arasha.kz.
Тоқтар Оңғарбайұлы 1946 жылы Қарағанды облысының Қарқаралы ауданында дүниеге келген. Бала кезінен аспан әлеміне қызыққан ол қажырлы еңбегі, табандылығы мен батылдығының арқасында әскери авиация саласында биік жетістіктерге қол жеткізді.
50-ден астам әскери ұшақты сынаған
Тоқтар Әубәкіров Кеңес Одағындағы ең білікті сынақшы-ұшқыштардың бірі болды. Ол 50-ден астам әскери ұшақтың алғашқы сынақтарына қатысып, авиациялық техниканың мүмкіндіктерін зерттеуге елеулі үлес қосты.
1988 жылы ауада жанармай құю арқылы Солтүстік полюске бағытталған тарихи ұшуды орындады. Кәсіби шеберлігі мен көрсеткен ерлігі үшін оған Кеңес Одағының Батыры атағы берілді.
Қазақтың ғарышқа жолын ашқан тарихи сапар
1991 жылғы 2 қазанда Тоқтар Әубәкіров «Союз ТМ-13» ғарыш кемесімен ғарышқа аттанды. Экипаж құрамында командир Александр Волков пен австриялық ғарышкер Франц Фибек болды.
Осы сапар арқылы Тоқтар Әубәкіров қазақ халқының ғарышқа ұшқан тұңғыш өкілі ретінде ел тарихында мәңгі қалды. Оның ерлігі Қазақстанның ғарыш саласының дамуына жол ашып, кейінгі буынға үлкен жігер мен рух сыйлады.
Тоқтар Әубәкіровтің өмір жолы – батылдықтың, отаншылдықтың және арманға адалдықтың жарқын үлгісі.
