Қазақстанда концерт кезінде вокалдық фонограмманы пайдалануға қатысты жаңа талаптар енгізілді. Енді көрерменге жанды дауыста өнер көрсеткендей әсер қалдырып, шын мәнінде фонограмма қолданғандар жауапкершілікке тартылуы мүмкін, деп хабарлайды Arasha.kz, Tiek.kz-ке сілтеме қалдырып.
Әкімшілік құқық бұзушылық туралы кодекстің 156-бабына енгізілген өзгерістерге сәйкес, концерттерде вокалдық фонограмманы пайдаланғаны үшін:
• алғаш рет анықталса, жеке тұлғаларға —100 АЕК, заңды тұлғаларға — 150 АЕК;
• бір жыл ішінде қайталанса, жеке тұлғаларға — 150 АЕК, заңды тұлғаларға — 200 АЕК көлемінде айыппұл қарастырылған.
Заңдағы талаптар телевизиялық түсірілімдер мен жазбаларға, сондай-ақ концерт өткізуге арнайы бейімделмеген орындардағы іс-шараларға қолданылмайды.
Жаңа талаптардың мақсаты - концерттік бағдарламаларда фонограмманы пайдалануды реттеу және көрерменге ұсынылатын өнердің ашықтығын қамтамасыз ету.
Ал сіз әншілердің концертте фонограммамен өнер көрсетуіне қалай қарайсыз?
