Иран Иордания аумағындағы АҚШ әскери базаларына зымыран соққысын жасағанын мәлімдеді. Иорданияның әуе қорғаныс күштері зымырандардың бір бөлігін әуеде ұстап қалған, деп хабарлайды Arasha.kz.
Al Hadath мәліметінше, Иорданияның әуе қорғаныс жүйесі Эль-Азрак қаласының үстінде Ираннан ұшырылған зымырандарды атып түсірген.
Кейін Al Jazeera Ирбид қаласы маңында да зымырандардың әуеде жойылғанын хабарлады.
Ал Иранның Mehr агенттігі Иордания аумағындағы америкалық әскери нысандарға жаппай зымыран соққысы жасалғанын мәлімдеді.
Бұл оқиға АҚШ-тың 8 қыркүйекте Ормуз бұғазындағы Харк аралы маңында бірнеше ирандық танкерге соққы жасағаны туралы хабардан кейін болды. АҚШ тарапы бұл әрекетін америкалық әскери кемеге бағытталған зымыран шабуылдарына жауап ретінде түсіндірген.
Өз кезегінде Иранның Ислам революциясы сақшылар корпусы АҚШ әрекетіне жауап ретінде Кувейт пен Бахрейн терминалдары маңындағы танкерлерге соққы жасалуы мүмкін екенін ескерткен.
Қазіргі уақытта тараптар таратқан мәліметтер әртүрлі дереккөздерге негізделіп отыр.
