Халықаралық іздеуден кейін Дубайдан Қазақстанға жеткізілген хакер өзіне тағылған алаяқтық айыбымен келіспейтінін айтты. Ол инвесторлар алдындағы берешегін кәсіпкерлік жобасының сәтсіздігімен түсіндірді. Бұл туралы сот отырысына қатысқан журналист Жанат Молдашева жазды, деп хабарлайды Arasha.kz.
Айыпталушының сөзінше, оның инвесторлардың қаражатын иемдену ниеті болмаған. Ол жауапкершілігі шектеулі серіктестік ашып, қызметін ресми жүргізгенін алға тартты.
«Егер қаражатты қалтама басып, қашып кетсем, мен нағыз алаяқ болар едім. Бірақ мен ЖШС тіркеп, ресми есеп жүргіздім, барлық міндеттемені орындадым», – деді ол.
Оның айтуынша, жобасының тоқтауына әзірлемесіне қатысты дау себеп болған. Айыпталушы 2024 жылы Цифрлық даму министрлігінің өкілдері Атырауға келгенде, басқа компания оның әзірлемесін көшіріп, мемлекеттік органдарға өз жобасы ретінде таныстырғанын мәлімдеді. Бұл — оның сотта айтқан нұсқасы.
Осы жағдайдан кейін шамамен 100 миллион теңге қарызға батқанын айтқан азамат берешегін өтеу үшін мейрамхана ашқан. Алайда бұл кәсіп те шығын әкелген. Оның сөзінше, 2025 жылы қылмыстық іс қозғалғаннан кейін Дубайға кеткен.
«Шетелде жүріп жұмыс істеп, қарызды жауып, оны қазіргі айыпта көрсетілген 13 миллион теңгеге дейін азайттым», – деді айыпталушы.
Жанат Молдашева сотта айтылған сомаға назар аударды. Журналистің жазуынша, ол бастапқыда істегі берешек жүздеген миллион теңге болуы мүмкін деп ойлаған. Алайда отырыста 13 миллион теңге туралы сөз болғанын жеткізді. Айыпталушы осы соманың 9 миллион теңгесін қайтарғанын, енді 4 миллион теңге қалғанын айтқан.
