Қазақстан футзал қауымдастығының президенті Нұрсұлтан Құрман қызметінен кететінін мәлімдеді. Ол бұл шешімі туралы әлеуметтік желідегі парақшасында жазып, отандық футзалдағы жұмысына қорытынды жасады, деп хабарлайды Arasha.kz.
Нұрсұлтан Құрман Қазақстан футзал қауымдастығының басшысы ретіндегі қызметін аяқтау туралы шешім қабылдағанын хабарлады. Оның айтуынша, бұл кезең кәсіби тәжірибеге, маңызды оқиғалар мен жауапты шешімдерге толы болған.
"Бүгін мен үшін маңызды кезеңдердің бірі аяқталып отыр. Қазақстан футзал қауымдастығының президенті қызметіндегі жұмысымды аяқтау туралы шешім қабылдадым. Бұл қызмет мен үшін үлкен жауапкершілікпен қатар, мол тәжірибе мен ерекше естеліктерге толы кезең болды", – деп жазды Құрман.
Ол қызмет барысында бірге еңбек еткен әріптестеріне, футзал клубтарының басшыларына, жаттықтырушыларға, ойыншылар мен жанкүйерлерге алғыс айтты. Сондай-ақ Қазақстан футбол федерациясының президенті Марат Омаровқа қолдау көрсетіп, бірлесіп жұмыс істеуге мүмкіндік бергені үшін ризашылығын білдірді.
"Маған сенім білдіріп, қолдау көрсеткені және бірлесіп жұмыс істеуге мүмкіндік жасағаны үшін ризашылығымды білдіремін. Ортақ мақсат жолындағы әріптестігіміз мен үшін бағалы тәжірибе болды", – деді ол.
Нұрсұлтан Құрман қауымдастықты басқарған уақытында жетістіктермен қатар түрлі қиындықтар да кездескенін жасырмады. Соған қарамастан, атқарылған жұмыстардың өзі үшін маңызды тәжірибе болғанын жеткізді.
Бұрынғы басшы Қазақстан футзалының болашағына сенім білдіріп, ұлттық құрама мен отандық клубтарға алдағы жарыстарда сәттілік тіледі. Сонымен қатар ол спорт саласындағы қызметін аяқтағаннан кейін жаңа жобалар мен бастамаларды жүзеге асыруды жоспарлап отырғанын аңғартты.
"Алда менің де жаңа жоспарларым мен тың бастамаларым бар. Олардың әрқайсысына үлкен үмітпен қараймын. Уақыты келгенде алдағы жоспарларым туралы сіздермен арнайы бөлісетін боламын. Бұл қоштасу емес, жаңа кезеңнің бастауы", – деп жазды Нұрсұлтан Құрман.
