LRT бойынша қылмыстық іс сотқа берілді.

Атышулы LRT құрылысына қатысы бар лауазымды тұлғалардың ісі сотқа тапсырылды. Күдіктілердің қатарында Нұр-Сұлтан қаласы әкімдігі мен Astana LRT ЖШС қызметкерлері бар. Бұл жайында Сыбайлас жемқорлыққа қарсы іс-қимыл агенттігінің аса маңызды істер жөніндегі тергеушісі Данияр Биғайдаров брифингте мәлімдеді.
«Сыбайлас жемқорлыққа қарсы іс-қимыл агенттігі жеңіл рельсті көлік жобасын іске асыру кезінде 5,8 миллиард теңгені жымқыру дерегіне қатысты қылмыстық істі аяқтап, сотқа жолдады», — деді Данияр Биғайдаров.
Елорданың сиқын кетіріп бозғылт бетон күйінде қалған жоба бойынша соттың алдында 7 адам жауап беретін болады. Ал, Қ.Сұлтанбеков және Т. Ардан бұлтартпау шарасымен халықаралық іздеуге берілген.