Елімізде коронавирусқа қарсы вакцинаның бірінші компонентін алатын азаматтар арасында екі бөлмелі баспана мен автокөлік ойнатылады.

«MEGA Silk Way» СОО «Астана Моторс» ҚМК және Нұр-Сұлтан әкімдігі бірлесіп «Вакцина ал — машина ұтып ал» акциясын бастайды.

23 маусым мен 31 тамыз аралығында «MEGA Silk Way» СОО-да COVID-19 вакцинасының бірінші компонентін алатын қазақстандықтар «Астана Моторс» компаниясынан Hyundai Accent автокөлігін ұтып ала алады. 

Финалдық ұтыс ойынын 5 қыркүйек күні «MEGA Silk Way» СОО Instagram арқылы тікелей эфирде өткізеді.

Сонымен қатар, апта сайын сыйлықтар ойнатылады — тұрмыстық техника, түрлі сертификаттар және тағы басқалар.

«Астана Моторс» автокөлігінің ұтыс ойынына 18 жастан асқан және 23 маусым мен 31 тамыз аралығында COVID-19 вакцинасының бірінші компонентін алған қазақстандықтар қатыса алады.

Бұл акцияның мақсаты — Қазақстанда вакцинация қарқынын ынталандыру. Вакцина — COVID-19-дан қорғанудың жалғыз, тиімді жолы. Мұндай акциялар түрлі елдерде сәтті өтіп жатыр. Жақында Польша, Таиланд, АҚШ, Ресей, Моңғолия, Сербия, Индонезия, Қытай, Венгрия, Израиль және т.б. үкіметтері вакцинацияланғандар арасында автокөлік ұтыс ойынын өткізуді қолға алған болатын.

Бұдан басқа, «Азия Парк», «Mega Silk Way», «Сарыарқа», «Абу-Даби Плаза», «Керуен», «Еуразия» СОО-да тұрмыстық және компьютерлік техника түріндегі бағалы сыйлықтар ойнатылады, сол сияқты жеңілдік купондары беріледі. Сондай-ақ, бұл акцияға «Мечта» электроника және тұрмыстық техника дүкендерінің сауда желісі қосылатын болады.
Сонымен қатар, Маңғыстауда вакцина алғандар арасында екі бөлмелі пәтер ұтысқа қойылды.