7 шілде күні кешкі сағат 21:09-да Қарағанды – Сұрыптау – Ағадыр аралығында жолаушылар пойызының машинисі шұғыл тежеу қолдануға мәжбүр болды. Себебі бөгде адам теміржол жолына кенеттен шығып кеткен. Алайда машинистің жедел әрекетіне қарамастан, соқтығысудың алдын алу мүмкін болмады. Бұл туралы ekaraganda.kz хабарлады.
«Қазақстан темір жолы» ұлттық компаниясының мәліметінше, зардап шеккен — алкогольдік масаң күйде болған әйел адам. Оқиға салдарынан ол аяғын сындырып, дереу Қарағанды – Сұрыптау станциясына шақыртылған жедел жәрдем бригадасына тапсырылды.
Апат салдарынан пойыздың жүру кестесі 18 минутқа кешікті.
Аталған факті бойынша Қарағанды – Сұрыптау станциясындағы көлік полициясының желілік бөлімінде теміржол көлігін пайдалану ережесін бұзу бабымен қылмыстық іс қозғалды. Қазір оқиғаға қатысты сотқа дейінгі тергеу амалдары жүріп жатыр.
